قال مول السر الضاوي
حزموني و رزموني
ويلا غضبت لا تكلموني
ندوي بالحال ما تفهموني
ويلا صحيت ننكر حالي
و عنداك تلوموني
ردو البال من شوكتي و الدعاوي
طلبو التسليم وطلقو الجاوي
شحال داز من عام و عام
و انت غارق في لوهام
ما بنيتي ساس ما رفعتي علام
ما تفقهتي ما تنورتي
الناس زرعات الصدق و حصدات الخير
وانت كلما خطيتي خطوة توخرتي
هلكتي راسك ولمتي الغير
و الصيف لي جا يلقاك داوي
استحليتي المديح و زواق لكلام
و فرحتي بلي شافك في لمنام
رخيتي وذنيك لكذوب الواشي
وصغيتي لهدور العشير الرغاي
تحزمتي بشريط راشي
وحضيتي الغادي ولي جاي
عجباتك سمية سيدي و مولاي
لبستي رزة وسلهام
و قلتي أنا مول الخبزة
أنا صاحب لمقام
و ملي ناضت النوضة
طيحتي الناس في الفوضى
عراو الطبيگة لقاوها منفوضة
جبدو الدلو لقاوه خاوي
صميتي وذنيك على كلام الحق والحكمة
و غمضتي عينيك و تلفتي في الظلمة
وليتي كتحسس في جنابك
شكيتي في صحابك وحبابك
ولي عطس تقول عليا داوي
جيتي تكحلها عورتيها
تفضحتي وكثرات عليك الشكاوي
آش ينفعو الصروف الا ما عندك ميزان
واش تقضي لحروف لمگروض اللسان
رد بالك يا الزربان
قبل ما دندن شوف وتارك واش مساوي
قالو سيادنا الاولين
الخاوي بلخاوي
يزرب و يبدا يداوي
يحسن عوانك يا المسكين
ما انت بلحية طويلة
ما انت بوجه زين
تقادات ليك الحيلة
و ضحكتي فيك الشامتين
وصلتي للسوق بكري
و خرجت بشواري خاوي
لقريب منك مبري
ولبعيد فيك داوي
هادي جزات قليل النية
هادي عقيبة القلب الغاوي
يا من صبرتي على طول كلامي
و استحسنتي هاد لحجية
طلب ربي يغفر ليا
و ينجيني من شر لمهاوي
والصلاة و السلام على زين السمية
طبيب لرواح وسقام لقلوب يداوي.
شعر: محمد شهابي
لا توجد تعليقات في هذه الصفحة.. كن أنت أول المتفاعلين!